வியாழன், 25 மார்ச், 2010

ப்ளாஸ்டிக் க்ளாஸ்



தூக்கம் விழித்த கதிரவன் ஒளிபரப்பப்பட்டிருக்கும் வானம் பார்த்துக்கொண்டே, பறவைகளை வானமும், வானத்தை பறவைகளும் அடைந்துவிட துடித்து கொண்டிருக்கும் அழகை காண்கிறான். என்னதான் சொன்னாலும் “ சொர்க்கமே என்றாலும் நம்ம ஊரை போல வருமா” ன்னு பாட்டு படிச்சிக்கிட்டே எழுந்திருச்சு மொட்டை மாடியிலிருந்து கீழே வருகிறான்.

“ஏலே! ஐயா டீ குடிக்கிறியா? உங்க அப்பனும் ஆத்தாளும் ஒத்த உசிறு ஊரிலே தவிச்சிட்டு கிடக்குதுன்னு நகரத்துல படிச்ச உன்னை இந்த காட்டுப்பய ஊருலே படிக்க அனுப்பிருக்காங்க, கொஞ்சம் சூதானமா நடந்துக்கய்யா? வடக்கூருக்கு போனா உன் வெளியூரு பேச்சையெல்லாம் இங்க பேசாதய்யா, போனமா டீ குடிச்சமான்னு வந்துரு....2 ரூபாய் கொடுத்து பேப்பரு வாங்கிட்டு வந்து எம்புட்டு படிக்கணுமோ, இங்கேயே படி ராசா? இந்தா பிடி 20 ரூபாய், டீ, இட்லி சாப்பிட்டுட்டுவா. பாட்டி ஒரு வாய் கஞ்சி குடிச்சிட்டு போய் புல்லறுத்துட்டு வாரேன்.”

“போ, பாட்டி. நான் படிச்சிருக்கேன், இந்தியா என் தாய்நாடு,எல்லோரும் இந்நாடு மன்னர்கள்னு, நான் அவனுங்கள் பேசி திருத்திடுறேன். நீ டென்ஷன் ஆகாத பாட்டி.”என்று கதிரவன், கதிரவன் பல்விளக்க சென்றான்.

வீட்டுக்கருகில் பாயும் ஓடை, துள்ளி பாயும் மீன்கள் சிதறி தெறிக்கும் தண்ணீர், எல்லாம் பார்க்க அழகாக இருந்தது. “ஏண்டா, நாம சென்னையில படிச்சோம், சின்ன வயசுலேயே ஊருக்கு வந்துருக்கலாம் அழகா இருந்திருக்கும். பத்தாம் வகுப்பு வரை அப்பா காக்க வச்சிட்டாரே.” என்று கதிரவனின் சிந்தனையை சிதறச்செய்தது இயற்கை

“கவனம்ய்யா....”என்ற பாட்டியின் குரல் தொடர்ந்து “ பாட்டி, வரேன், புதுக்குடிக்கு கொடைக்கு போன தாத்தா வந்தா அந்த கஞ்சியை குடிக்க சொல்லுயா..”என்றதோடு மறைந்தது

“சரி பாட்டி.”என்று கதிரவன் பறந்து செல்லும் பறவைகளை பார்த்தபடியே பதில் சொன்னான்.

தனது தாத்தா சுடலைமுத்துவுடைய பெயர் சைக்கிளில் எழுதப்பட்டிருந்தது. கொஞ்சம் சீட் விலகி கொஞ்சம் லூசாகியிருந்தது. லேசாக சரி செய்து கொண்டு, சைக்கிளை அழுத்தினான். சைக்கிள் முன்னோக்கி நகர, இவனுக்கு சிந்தனை செல்வியை நோக்கி நகர்ந்தது. முந்தைய நாள் பள்ளி நிகழ்வுகள் நினைவுக்கு வந்தது.

காலை எட்டு மணி, வெள்ளிக்கிழமை, பள்ளிக்கூடம் திறந்த முதல்நாள், மறுநாள் சனிக்கிழமை விடுமுறை. குறைந்த எண்ணிகையிலேயே மாணவர்கள் வந்திருந்தனர். அறிவியல் ஆசிரியர்தான் முதலில் வகுப்புக்கு வந்தார். அனைவருடைய பெயரையும் கேட்டுவிட்டு, இன்று பாடம் ஏதுமில்லை, “அதனால், என் ஆலோசனைகளை மட்டும் பகிர்ந்து கொள்கிறேன்” என்று தொடங்கி “பசங்க பொண்ணுங்ககிட்ட, பொண்ணுங்க பசங்ககிட்ட பள்ளிக்கூட நேரங்களில், பேசக்கூடாது, படிக்கிற வயதில் படிக்கணும், சாதிச்சு பெரிய ஆளா வரணும்னு...............” நிறைய நிறைய பேசிட்டே வகுப்பறையை விட்டு நேரம் முடிந்து வெளியே சென்றுவிட்டார்.

“பசங்க பொண்ணுங்ககிட்ட...” ன்னு ஆசிரியர் சொன்னவுடன்தான் கதிரவன் பெண்கள் அந்த அறையில் இருப்பதை கவனித்தான். அத்தனை பெண்களும் ஆண்களின் பார்வையில் அலட்டி கொள்ள, கொஞ்சம் முகத்தில் திமிரோடு அமர்ந்திருந்தாள். “திமிருக்கு அழகென்று பெயர்” என்ற தபூ சங்கரின் நூலை கொடுத்துவிடலாமென்று தோன்றியது, எல்லாம் அவன் நூலக நண்பனின் பழக்கதோசம். மதிய இடைவேளையில் சாப்பாடு பையோடு மரத்தடியில் அமர்ந்தாள் செல்வி. தோழிகள் யாரும் அவளோடு இல்லை. நல்ல சூழலில் ஏதாவது பேசிடலாமென்று சென்றவனை அவள் பார்த்ததை இவன் பார்த்ததும் இரண்டடி பின்நகர்ந்த்து மீண்டும் முன்நகர்ந்தான்.

அருகில் சென்று “ சாப்பிட போறீயா?”என்று அசடு வழிந்தான். அவளுடைய பார்வைக்கு பதில் பார்வை தராமல் எங்கோ பார்த்துக் கொண்டு அருகிலேயே நின்றான். அவன் இவனை ஒரு பொருட்டாக மதிக்காமல், சாப்பிட்டு முடித்துவிட்டு எழுந்தும் விட்டாள்.

“என்ன லவ்வா, போங்கடா? நடக்கிற கதையை பாருங்க...சாதாரணமா பொண்ணுங்களே எங்கப்பாவுக்கு பயந்து பக்கத்துல வரமாட்ராளுக, வந்தவனுங்களும் இன்னாரு மகள்னு சொன்னதும், வந்த வழித்தடத்தை கூட அழிச்சிட்டு போயிடுறானுங்க..நீ என்னடான்னா? 15 நிமிசமா அசடு வழியுற...உனக்கு நான் வேலை வைக்கலை.....உன் மூஞ்சே சொல்லுது...உனக்கு எனக்கும் ஒத்து வராது. ஏன்னா நீ ப்ளாஸ்டிக் க்ளாஸ் நான் கண்ணாடி க்ளாஸ்”

கதிரவனுக்கு ஒரே அதிர்ச்சி, “நாம் காதலிக்கிறதா சொல்லவே இல்லை, நட்புக்குத்தான் முயற்சி செய்யலாமுன்னு பார்த்தோம், அதுக்குள்ள அவளாவே படபடன்னு அப்பளப்பூ மாதிரி பொறிஞ்சு தள்ளிட்டு போறா.. ம் நமக்கொரு காலம் வரும் இப்படி பொறியறதுக்கு.” ன்னு திரும்பவும் பள்ளிக்கூடத்துல உள்ளதில சொன்னதை உளறிட்டே வரான்............

“யாருப்பா அது? புதுசா இருக்கு..சொல்லைமுத்து பேரன்தானே நீ?” அலாரமடித்து கேட்டு சைக்கிள் கனவை கலைத்தார், வடக்கு ஊர் தாத்தா.

“ம், ஆமாம்” ன்னு இவன் மண்டையாட்ட

“உங்க தாத்தன்ன எங்கே”ன்னு 50 வயது மதிக்கத்தக்க நபர் 70 வயது கதிரவனோட தாத்தாவ விசாரிக்கவும்..வந்த கோவத்தில பாட்டி சொன்ன “நகரத்து பேச்சை பேசாதேங்”கிற வசனம் நினைவுக்கு வந்தது, வந்ததை அடக்கி கொண்டான்.

கடைக்குள் நுழைந்தவன் இட்லி சாப்பிட அமர்ந்தான்..

வாழை இலை போட்டு பரிமாறப்பட்டது, சாப்பிட்டு முடித்தவுடன் இலையை இவனையே எடுத்து சென்று குப்பையில் போடச் சொன்னார்கள். கதிரவனுக்கு அந்த அணுகுமுறை பிடித்திருந்தது...தன் வேலையை தானே செய்யணும்னு பள்ளிக்கூடத்துல சொல்லிக்கொடுத்தது மாதிரியே இருக்கே...ன்னு நினைச்சிக்கிட்டான்

கைகழுவி விட்டு கடையின் வாசல் பக்கம் வந்தவன்..

“ஐயா ஒரு டீ போடுங்க”ன்னு சொல்லிட்டு சுத்துமுத்தும் பார்த்தான் குப்பையில் பிளாஸ்டிக் கிளாஸும், இலையோடு சேர்ந்து கிடந்தது...அலமாரியில் அதிகம் பயன்படுத்தப்படாத சில்வர் பாத்திரமும், க்ளாசும் அடுக்கி வைக்கப்பட்டிருந்தது. நோட்டம் விட்டே கொண்டிருந்தவனின் கண்ணில் செல்வியும், அவரோடு வந்த முதியவரும் கண்ணில் பட்டனர்.

செல்வி “ போய்ட்டு சாயந்தரமா வந்துடறேன் தாத்தா, அத்தை வீட்டுக்கு போய் சேர்ந்ததும் ஃஃபோன் பண்றேன்” னு சொல்லி விட்டு தேநீர் கடைக்கு அருகிலிருகும் நிறுத்தத்திலிருந்து பேருந்தில் ஏறி பயணம் செய்கிறாள்.

அந்த முதியவர், மெல்ல நகர்ந்து கதிரவனை நோக்கி வர, செல்விதான் ஏதும் சொல்லிக் கொடுத்திருப்பாளோ, நம்மிடம் வந்து அந்த தாத்தா என்ன சொல்வாரோ? என்ன கேட்பாரோ என்ற அச்சத்தில் திரும்பி நின்று கொண்டான் கதிரவன்...

“ஏலே, ஒரு டீ போடுறா?” ன்னு ஒரு குரல். பின் திரும்பினால் அதே தாத்தா...

சிறுது நேரத்தில் இருவருக்கும் டீ வழங்கப்பட்டது, தாத்தாவுக்கு கண்ணாடி க்ளாசிலும், கதிரவனுக்கு ப்ளாஸ்டிக் க்ளாசிலும். அப்பொழுதுதான் குப்பையில் கிடந்த ப்ளாஸ்டிக் க்ளாசை பரிதாபத்தோடு பார்த்துவிட்டு.....

அதுவரை செல்வியை காதலிக்க சிந்திக்காத கதிரவன், அவளை காதலித்தால்தான் என்ன என்று வேகமாய் சைக்கிளை அழுத்தி பயணத்தை தொடர்ந்தான்..............


காதல் இப்படித்தான் நிகழ்ந்துவிடுகிறது

கறை நல்லது............?


இரண்டங்குலம் இன்னும் நெருக்கி நடந்தால் பள்ளிக்கூடத்தினுள் நுழைந்துவிடலாம். நெருங்காமல் கடந்து செல்கிறான் முத்து. பள்ளிக்கு அருகிலிருக்கும் ஈர்ப்பு காரணமோ என்னவோ? எட்டா கனிக்கு ஏன் கொட்டாவி விட வேண்டாம் என்று நினைத்துக் கொண்டானோ தெரியவில்லை...கடந்தாண்டு இதே பள்ளியினுள் இருந்து வெளியே வந்தது இன்னும் நினைவிருக்கிறது அவனுக்கு...பள்ளிக்கருகில் இப்பொழுது சென்று 50 காசுக்கு தேன் மிட்டாய் வாங்கி சப்பிக் கொண்டு என்ன நினைத்தானோ தெரியவில்லை...அருகிலிக்கும் மசாலா கடலை தயாரிக்கும் கூடத்தினுள் நுழைந்துவிட்டான்...

அந்த பணிக்கூடம் வெளியே புகை கக்கி கொண்டேயிருக்கிறது. சன்னல் வழியே அனல்காற்று வீசுகிறது. நம் கண்களும் உள்ளே சென்ற சிறுவனை தேடுகிறதில்லையா...நாளும் அவனை கவனித்தால் தேடாது, உங்கள் கண்களை கொஞ்சம் காத்திருக்கச் சொல்லுங்கள். பள்ளிக்கு இடைவேளை விடப்படுகிறது, அருகிலிருக்கும் பெட்டிக்கடையில் நிறைய குழந்தைகள் ஈ போல் மொய்த்து கொண்டிருக்கின்றனர்..ஆளுக்கு 50 பைசா, 1 ரூபாய்..5 ரூபாய் என்று வசதிப்படி தின்பண்டம் வாங்கி தின்கின்றனர்.

மாலை சரியாக நான்கு மணி பள்ளியின் இறுதி மணி அடிக்கிறது. வெண்மை நிற சட்டை அணிந்து சென்ற முத்து இப்பொழுது கரிக்கறையோடு வருகிறான். சட்டையின் வெண்மை குறையாத அழுக்குப்படியாத சட்டைகளோடு மாணவர்கள் நடந்து செல்கின்றனர். இவன் தன் கறையை தடவியபடி அவர்களை கடந்து செல்கின்றான் முத்து. சாலையின் இருபுறமும் இருக்கும் பலகைகள், பதாகைகள் ஆகியற்றை பார்த்து கொண்டே செல்கிறான்..

“ குழந்தைகளை பணிக்கு அமர்த்தாதீர்கள்” “குழந்தைகளை பணிக்கு அமர்த்துவது சட்டப்படி குற்றம்” என்று பதாகைகள் மிளிர்கின்றன.

ஏழைக்கெதற்கு பொழுதுபோக்கென்று நினைத்தார்களோ என்னவோ எந்த கேள்வியும் கேட்காமல் பொழுதுபோக்கு சாதனங்களை பாதுகாப்பாக கண்ணாடி கூண்டுக்குள் அடைத்து வைத்திருக்கின்றனர் கடைக்காரர்கள்.....முத்துவுக்கும் ஏழ்மைக்கும் தொலைவா என்ன? தொலைவிலிருந்த படியே ஒரு கடையின் முன் நின்று தொலைக்காட்சியை வெறித்து பார்த்து கொண்டிருக்கிறான்....

“ கறை நல்லது.........”என்று ஒரு சிறுகுழந்தை நடிக்கும் விளம்பரப்படம் ஒளி(லி)க்கிறது.

நீங்க சொல்லுங்க கறை நல்லதா?

வியாழன், 4 மார்ச், 2010

நாங்க‌தாண்டா சாமி(யார்?) ‍அக‌ம் பிர‌ம்மாஷ்மி ‍‍‍- மகிழ்நன்.பா



நித்யான‌ந்தா, க‌ல்கி, தேவ‌நாதன், புவ‌னேஷ்வ‌ரி இந்த‌ பெய‌ர்க‌ளை ப‌டித்தால் என்ன‌ நினைவுக்கு வ‌ருகிற‌து? நானேதும் த‌வ‌றாக‌ எழுத‌த்தொட‌ங்கி க‌வ‌னக்குறைவின் கார‌ண‌மாக‌ புவ‌னேசுவ‌ரியை இந்த‌ கோஷ்டிக‌ளோடு இணைத்துவிட‌வில்லை. ஆங்கில வ‌ழி ப‌ள்ளிக்கூட‌ங்க‌ளில் ‍‍‍Odd Man Out என்ற‌ வ‌கையில் கேள்விக‌ள் வ‌ரும். அதில் குறிப்பிட்ட‌ ப‌ண்பின்ப‌டி விதிவில‌க்கான‌தை த‌னியே பிரித்து, ப‌திலாக‌ எழுத‌ வேண்டும். மேலுள்ள‌ வ‌ரிசையில் புவ‌னேசுவ‌ரி பெண் என்ப‌தை தாண்டி எந்த‌ வேறுபாடு புனித‌(?), புதிர் க‌சுமால‌ங்க‌ளுக்கு இல்லை.

பாலிய‌ல் வேட்கை என்ப‌து அனைவ‌ருக்கும் பொதுவான‌து. சொல்லித‌ர‌ வேண்டிய‌ க‌லை இல்லை ம‌ன்மத‌க‌லை. ஆனால், இதையெல்லாம‌ க‌ட‌ந்த‌வ‌ர்க‌ள் போல‌ த‌ங்க‌ளை ச‌மூக‌த்தில் அடையாள‌ப்ப‌டுத்திக் கொண்டு, ம‌க்க‌ளுக்கு அறிவுரைக‌ள் வ‌ழ‌ங்கி ந‌ல‌வ‌ழிப்ப‌டுத்த‌ வ‌ந்த‌ தூத‌ர்க‌ள் போல‌ ச‌மூக‌த்தில் ந‌ற்பெய‌ரை ச‌ம்பாதித்துக் கொண்டு, அதே ந‌ற்பெய‌ரை அர‌சிய‌ல் செல்வாக்குக்கும் பய‌ன்ப‌டுத்திக் கொண்டு, சிறிது சிறிதாக‌ க‌ருப்ப‌ண‌த்தை ப‌துக்குவ‌தில் தொட‌ங்கி, அர‌சிய‌ல் ந‌க‌ர்வுக‌ள், த‌ர‌கு வேலைக‌ள் என விரிவ‌டைந்து, ப‌‌ண‌ புழ‌க்க‌ம் அதிக‌மான‌து தன‌க்குத்தானே போட்டுக் கொண்டு காவி வேட‌த்தை க‌லைந்து சினிமா ந‌டிகைக‌ளை த‌ங்க‌ள் வேட்கை தீர்க்க‌ ப‌ய‌ன்ப‌டுத்திக் கொள்வ‌து(சினிமா காவி கோஷ்டிக‌ளையும் கெடுத்து விடுகிற‌தே :‍‍‍‍)). ம‌க்க‌ளும் இவர்க‌ளை ந‌ம்பி கோடி கோடியாய் ப‌ண‌த்தை கொட்ட‌, இவ‌ர்க‌ள் இப்ப‌டி கொட்ட‌மடித்துக் கொண்டிருக்கின்ற‌ன‌ர். ந‌ம் ம‌க்க‌ளும் ஒன்றும் முட்டாள்க‌ள‌ல்லர், அக‌ப்ப‌ட்ட‌வனை நம்பி போவதற்கு, இனி அக‌ப்ப‌ட‌ப்போகிற‌வ‌னிட‌ம் போய்தான் ஏமாறுகின்ற‌ன‌ர்.

புவ‌னேசுவ‌ரியின் செய்தியில் புவ‌னேசுவ‌ரி ம‌ட்டும்தான் ஒழுக்க‌ கேடான‌வ‌ர் போலும், ம‌ற்ற‌ ந‌டிக‌ர், ந‌டிகைக‌ள் ஒழுக்க‌மான‌வ‌ர்க‌ள் போல‌வும் சில‌ சினிமா ந‌டிக‌ர்க‌ளின் நாட‌க‌ காட்சிக‌ள் ஊட‌க‌ங்க‌ள் வாயிலாக‌வே, ஊட‌க‌த்திற்கு எதிராக அர‌ங்கேறின‌. ம‌க்க‌ளின் ஆழ்ம‌ன‌ வேட்கைக‌ளை தூண்டுவிடும்ப‌டியாக‌ திரையில் ந‌டித்து சாமியார்க‌ளிட‌மும், தொழில‌திப‌ர்க‌ளிட‌மும் த‌ஞ்ச‌ம‌டையும்‌ சில‌(?) ந‌டிகைக‌ள், அதை தெரிந்த‌ ந‌டிக‌ர்க‌ள் இன்று ர‌ஞ்சிதாவுக்கு ஆத‌ர‌வாக‌ போராட‌ வ‌ருவார்க‌ளா என்ப‌து அவ‌ர்க‌ளுக்கே வெளிச்ச‌ம்.

திரை உல‌கில் இருக்கும் ச‌ங்க‌ங்க‌ளாவது ஏதாவ‌து எதிர்ப்பை ப‌திவு செய்யுமா? சாமியார்க‌ளுக்கு எதிராக‌ போராட்ட‌ம் ந‌ட‌த்துவார்க‌ளா என்றால் க‌ண்டிப்பாக‌ ஏதும் ந‌ட‌க்காது, இவ‌ர்க‌ள் திரையில் செய்வ‌து அந்த‌ சாமியார்க‌ள் திரைம‌றைவில் செய்கின்ற‌ன‌ர். சில‌ நேர‌ங்க‌ளில் வெளிப்ப‌ட்டு விடுகிற‌து. திரைத்துறையில் இருந்து ஒரு க‌வ‌லை வ‌ருமானால் அது அந்த‌ ஒளிப்ப‌ட‌ காட்சியில் குறைந்த‌ லைட்டிங், கேமரா ஆங்கிள் போன்ற‌வ‌ற்றை குறித்து ம‌ட்டும்தான் இருக்கும்.

யாருமே இல்லாத‌ க‌டையில் டீ ஆற்றுவ‌து போல‌, யாருமே இந்து ம‌த‌த்தை கிழித்து தொங்க‌ விடுவ‌த‌ற்கு முன் தாங்க‌ளே த‌ங்க‌ள் சாமியார் நிறுவ‌ன‌ங்க‌ளும் ஒன்றான‌ நித்தியான‌ந்தாவுக்கு எதிராக‌ போராட‌ தொட‌ங்கியிருக்கிறார்க‌ள் இந்து ம‌க்க‌ள் க‌ட்சி போன்ற‌ அமைப்புக‌ள். நித்தியான‌ந்தாவின் ப‌ட‌ங்க‌ளை எரிப்ப‌து, அலுவ‌ல‌க‌ங்க‌ள் சூறையாட‌ப்ப‌டுவ‌து போன்ற‌ ந‌ட‌வ‌டிக்கைக‌ள் உண்மையிலேயே ஒரு முர‌ண்தான். வேறு யாரும் தாக்கும் முன்ன‌ரே தங்க‌ளை தாங்க‌ளே அடித்துக் கொண்டால் அடியின் வ‌லி குறைவாக‌ இருக்கும் என்ற‌ எண்ண‌மோ என்ன‌வோ? இதில் இவ‌ர்க‌ள‌து வேடிக்கையான‌ கோரிக்கை என்ன‌வென்றால்

" நித்தியான‌ந்தா குற்ற‌ம‌ற்ற‌வ‌ர் என்று குற்ற‌ம‌ற்ற‌வ‌ர் என்று நிருபித்த‌ பின் ச‌மூக‌த்தில் ந‌ட‌மாட‌ வேண்டுமாம்."

அப்ப‌டி என்ன‌ த‌வ‌றிழைத்து விட்டார் நித்தி(செல்ல‌மா கூப்பிட‌லாமேன்னுதான்) கிருட்டிண‌ன் கோபிக‌ளோடு(அடுத்த‌வ‌ர் ம‌னைவிக‌ளோடு) செய்யாத‌‌ லீலைக‌ளா, இந்திர‌ன் செய்யாத‌ சேட்டையா? புராண‌ங்க‌ள் சொல்லாத‌ முறைய‌ற்ற‌ க‌ல‌வியா? இந்த‌ நிலைக‌ளையெல்லாம் இவ‌ர் என்ன க‌ட‌ந்தாவிட்டார்....இன்னும் சொல்லப்போனால் இப்ப‌தானே முத‌ல் வ‌குப்பில் கால‌டி எடுத்து வைத்திருக்கிறார். ப‌ர‌மான‌ந்த‌ நிலையை அடைய‌ விரும்புவ‌ரை பிரேமான‌ந்தா போன‌ இட‌த்திற்கு அனுப்ப‌ பார்க்கிறார்க‌ளே என்ன‌ கொடுமை சார் இது?

நித்தியான‌ந்தாவுக்கு எதிராக‌ போராடும் இந்து அமைப்புக‌ள் முத‌லில் ந‌ம்ப‌க‌மான‌ சாமியார்க‌ள் ப‌ட்டிய‌லை வெளியிட‌ட‌ட்டும். த‌யாரா? ஆனால், அத‌ன் பிற‌கு த‌வ‌று ந‌ட‌ந்தால் ச‌ங்க‌ங்க‌ளை க‌லைத்துவிட்டு ஊர்போய் சேர்ந்து வேலைவெட்டியை பார்க்க‌ட்டும்.

அடுத்து நாம் பார்க்க‌போற‌ ப‌ட‌ம் க‌ல்கி.............
தேவ‌நாத‌ன், நித்தி ப‌ட‌ங்க‌ளின் விம‌ர்சன‌ங்களே இத‌ற்கு அப்ப‌டியே ஒத்துப்போவ‌தால் மேற்கொண்டு அதையே எழுதி கிறுக்கி உங்க‌ள் நேர‌த்தை வீணடிக்க வேண்டுமா? என்ன‌....

அடுத்து நாம் க‌வ‌னிக்க‌ வேண்டிய‌து செய்தித்தாள் ம‌ற்றும் காட்சி ஊட‌க‌ங்க‌ள், ஈழ‌ப்பிர‌ச்சினையில் வாய்மூடி மௌன‌மாய் இந்திய‌ அதிகார‌ வர்க்க‌த்தின் கூட்டு திருட‌ர்க‌ளாய் இருந்துவிட்டு, ச‌மூக‌த்தில் மிக‌ முக்கிய‌ பிர‌ச்சினைப்போல் ந‌ம் வ‌ர‌வேற்ப‌றைக்குள் நுழைந்து ஆபாச‌ ப‌ட‌த்தை ஓட்டுகின்ற‌ன‌. ச‌தைக‌ளை ந‌ம்பியே க‌தையை ஓட்டி கொண்டிருக்கும் இந்த‌ ஊட‌க‌ங்க‌ளுக்கு க‌ண்டிப்பாக‌ இந்த‌ சாமியார்க‌ளை குறித்த‌ புனித‌ பிம்ப‌த்தை உடைப்ப‌து என்ற‌ நேர்மையான‌ நோக்க‌ம் ம‌ட்டும் இருக்காது, எல்லாம் TRP ரேட்டிங் செய்ற‌ மாய‌ம். காலையில் இவ‌ர்க‌ள் த‌ங்க‌ள் நிக‌ழ்ச்சிக‌ளை ஓட்டுவ‌தே இந்த‌மாதிரி அண்டைக்காக்க‌ கொண்டைக்கார‌ சாமியார்க‌ளை வைத்துதானே. (தேவ‌நாத‌னுக்கு இவ்வ‌ள‌வு ஃபோக‌ஸ் இல்லை, க‌வ‌னிக்க‌வும்).

ஆக‌, ம‌த‌ம் என்னும் ம‌க்க‌ளை சுர‌ண்டும் நிறுவ‌ன‌ அமைப்பு, அத‌ன் த‌ரகர்‌க‌ளாக‌ செய‌ல்ப‌டும் நித்தியான‌ந்தா போன்ற‌ சாமியார்க‌ள், ம‌க்க‌ளின் நிம்ம‌தியான‌ வாழ்வை கெடுக்கும் அடிப்ப‌டைவாத‌ அமைப்புக‌ள், இவ‌ர்க‌ளுக்கு துணைபோகும் ஊட‌க‌ங்க‌ள் என ந‌ம் ச‌மூக‌த்தை சீர‌ழிக்கும் க‌ருவிக‌ளிலிருந்து த‌ற்காத்து‌ ப‌ண்ப‌ட்ட‌ வாழ்வு வாழ்வ‌தே சிற‌ந்த‌து.